
बागलुङ : धवलागिरि साहित्य प्रतिष्ठान बागलुङले चार जना साहित्यकारलाई पुरस्कृत गरेको छ ।
कार्यक्रममा ‘फरेना’ उपन्यासका लेखक सन्तोष श्रेष्ठलाई सत्रौं ‘काजी रोशन साहित्य पुरस्कार’ बाट पुरस्कृत गरिएको छ । श्रेष्ठलाई २५ हजार नगद, दोसल्ला र कदरपत्रले पुरस्कृत गरिएको हो ।
दर्जनौ गीतमा संगीत भरेका श्रेष्ठले थारु समुदाय र कमलरी प्रथामा उपन्यास लेख्नु भएको हो ।
कार्यक्रममा बम सरस्वती साहित्य पुरस्कार साहित्यकार गोविन्दप्रसाद घिमिरेलाई प्रदान गरिएको छ । निजामती सेवाबाट निवृत्त भएका घिमिरेले ५० भन्दा बढी कृति प्रकाशित गरिसक्नु भएको छ । घिमिरेलाई नगद १५ हजारसहित दोसल्ला र कदरपत्रले पुरस्कृत गरिएको हो ।
प्रतिष्ठानबाटै प्रदान गरिने हिम मन्दरा स्मृति पुरस्कार साहित्यकार हरिराज शर्मा हरिषलाई प्रदान गरिएको छ । शर्मालाई नगद १५ हजारसहित दोसल्ला र कदरपत्रले पुरस्कृत गरिएको हो ।
चार जना साहित्यकारलाई प्रमुख जिल्ला अधिकारी नेत्र प्रसाद सुवेदी, धौलागिरि बहुमुखी क्याम्पसका क्याम्पस प्रमुख प्रा.डा. रामप्रसाद उपाध्याय र साहियकार गंगा सुवेदीले दोसल्ला र कदरपत्रले पुरस्कृत गर्नु भएको हो ।
सो अवसरमा धनकुटाबाट गर्गाचार्य प्रतिष्ठानले प्रदान गर्दै आएको मधुश्री विशिष्ट साहित्य पुरस्कार धवलागिरि साहित्य प्रतिष्ठानका अध्यक्ष काजी रोशनलाई प्रदान गरिएको छ ।
१५ हजार नगद र प्रमाणपत्र रहेको उक्त पुरस्कार कार्यक्रमका प्रमुख अतिथि बिराटनगरकी साहित्यकार तथा कलाकार गंगा सुवेदीले प्रदान गर्नु भएको थियो ।कार्यक्रममा बागलुङका प्रमुख जिल्ला अधिकारी नेत्रप्रसाद सुवेदी ‘प्रयास’ द्वारा लिखित ‘प्रयासका कविता’ कृति विमोचन समेत गरिएको छ ।
धवलागिरि साहित्य प्रतिष्ठानले प्रकाशित गरेको कृतिमा प्रयासका ६२ वटा कविता तथा गजल संग्रह गरिएको छ ।
उनले प्रकृति, राजनीति, समाज लगायतका विषयमा कविता लेख्नु भएको छ । साथै बुटवलका विष्णु प्रसाद सुवेदीले तयार पारेका एक सयबढी चित्रकलाको प्रर्दशनी समेत गरिएको थियो ।
उक्त अवसरमा सुवेदीले प्रकृति र ल्याण्डस्केप बारे चित्र कोर्ने गरेको बताउनुभयो ।
कार्यक्रममा धवलागिरि बहुमुखी क्याम्पसका प्रमुख प्रा डा राप्रसाद उपाध्याय, सहायक क्याम्पस प्रमुख उपप्राध्यापक हरिप्रसाद पाण्डेय, साहित्यकार सन्तोष श्रेष्ठ, साहित्यकार गोविन्द प्रसाद घिमिरे, रत्न–श्रेष्ठ पुरस्कार गुठीका संस्थापक संरक्षक साहित्यकार प्रेम छोटा, नेकपा एमाले बागलुङकी ईन्चार्ज मन केसी, साहित्यकार सरस्वती शर्मा ‘जिज्ञासु’ र जिल्ला प्रशासन कार्यालय बागलुङका प्रमुख जिल्ला अधिकारी एवंम कवि नेत्र प्रसाद सुवेदी ‘प्रयास’ले मन्तव्य व्यक्त गरेका थिए ।
कार्यक्रम धौलागिरि साहित्य प्रतिष्ठानका अध्यक्ष काजि रोशनको अध्यक्षता, सदस्य धनराज सापकोटाको स्वागत र सचिव राम थापा ‘अविरल’ को सञ्चालनमा सम्पन्न भएको थियो ।

बाग्लुङ सेवा समाज अमेरिका न्युयोर्क च्याप्टरको अधिवेशन सम्पन्न , जिबनाथ कँडेलकाे नेतृत्वमा नयाँ कार्यसमिती

बागलुङ क्षेत्र नं १ मा ईन्जिनियर खिमानन्द कँडेलकाे चर्चा

जेठ १४ बाट हराएका सिगानाका कुमार परियार अझै भेटिएनन्

रुपा गौतम हत्या काण्ड र कालीगण्डकी दोहनबारे प्रदेश प्रहरी प्रमुख जाेशीसंग विशेष कुराकानी (भिडियो)
